شرين غنت لي وقالت ما كبرتش فيها

أغنية جميلة جدا كل ما أسمعها عينية تدمع طبعا هتقولو ايه الراجل الخرع ده لا والله بجد اغنية جميلة مع اني مش بسمع أغاني لكن ساعات الواحد فيه حاجات بتعلق معاه يمكن عشان الواحد بقاله سنتين منزلش مصر ويمكن عشان العيال سافرو وانا قاعد لوحدي ويمكن عشان الكلمات بتعبرفعلا عن اللي جوا الواحد مننا في الغربة ويمكن عشان قالت ما كبرتش فيها المهم هيه أغنيه عجبتني والسلام وأسيبكم مع الكلمات

بلدنا أمانة فى ايدنا نعليهامادام عايشين نعيش فيها سنين وسنين واحنا مطمنين

ماشربتش من نيلها طب جربت تغنيلهاجربت فى عز ما تحزن تمشي فى شوارعها وتشيكلها

ما مشيتش فى ضواحيها طيب ما كبرتش فيها ولا ليك صورة على الرملة كانت على الشط فى موانيها

دور جواك تلقها هي الصحبة وهي الاهل عشرة بلدي بتبقى نسيانها على البال مش سهل

يمكن ناسي انك فيها مش وحشاك ولا غبت عليها اصل اللى مجرب وفارقها قال فى الدنيا مفيش بعديها

ان غبت بحنلها وانسى الدنيا واجيلها وان جيت انسى تفكرني مليون ذكرى القلب شايلها

غالية بلدنا علينا وهتفضل فى عنينا ومادام بنحب بلدنا يبقى هتتغير بايدنا

احنا اللى نعليها بايدنا نخليهااجمل لينا ولولادنا مهما العمر يعدي علينا

دور جواك تلقها هى الصحبة وهي الاهل عشرة بلدى بتبقى نسيانها على البال مش سهل

يمكن ناسي انك فيها مش وحشاك ولا غبت عليها اصل اللى مجرب وفارقها قال فى الدنيا مفيش بعديها

ماشربتش من نيلها طب جربت تغنيلها جربت فى عز ما تحزن تمشي فى شوارعها وتشكيلها

مامشيتش فى ضواحيها طيب ما كبرتش فيهاولا ليك صورة على الرملة كانت على الشط فى موانيها

غالية بلدنا علينا وهتفضل فى عنيناومادام بنحب بلدنا يبقى هتتغير بايدنا

احنا اللى نعليها بايدنا نخليهااجمل لينا ولولادنا مهما العمر يعدي علينا

ايه قيمتك من عيلتك

النهارده تقريبا عدى حوالي 42 يوم على سفر المدام والأولاد لمصر وطول المدة دي وانا بصراحة حاسس ان الدنيا ملهاش طعم رغم ان طعمها معاهم ساعات مر شوية او على رائ المدام اني الحاضر الغائب في البيت والكلام ده هيه عندها حق فيه لان كان في موضوع واكل دماغي وانا بصراحة لما تكون فيه حاجة في دماغي بقعد اهرش اقصد بقعد افكر فيها ليل نهار مع اني انا اساسا من الناس اللي بتكبر دمغها لكن منه لله اللي دعا عليا

المهم نرجع لموضوعنا ايه هيه قيمتك في الدنيا دي من غيرأهلك وطبعا المقصود بأهلك بعد الأب والأم همه مراتك وولادك لأن بقيت أهلك إيدك منهم والأرض إلا ما رحم ربك ,يعني مثلا لو مراتك وولادك اخدو اجازة وسافرو وانت بقيت لوحدك حياتك هتبقى عاملة ازاي اكيد حاجة من اتنين

واحد هيقولك ياعم ده كده فل الفل وتعيش حياتك وتعمل اللي نفسك فيه وتخرج وتطلع زي ما انت عايز من غير تحقيق وتصرف زي ما انت عايز من غير تفتيش واكيد اصحاب النظرية دي مش كتير من اللي اعرفهم هو واحد بس واكيد عارف نفسه لانه كده كده عايش مع نفسه

اما النوعيه الثانية والعبدلله منهم في الأول تحس كده انك حروالحياة هتبقى لذيذة وبقيت لوحدك وهتعمل اللي انته عاوزه بعدين تكتشف اساسا انك كنت بتعمل اللي انت عاوزه ومفيش جديد يتعمل اساسا بعدين الاقي نفسي مش عارف اعمل ايه حساس اني مليش لازمه في الدنيا اه والله احساس غريب تحس كده ان ربنا خلقك عشان تخلف العيال دي وتربيها ده لو ماكنش همه اللي بيربوك واحساس الوحده ياخدك كل يوم وتكلم نفسك وتقعد على النت وربنا يخليلينا الدي اس ال والمدونات فعلا اختراع ممتاز هنرجعله في موضوع تاني

يعني الخلاصة في رأيي الشخصى وهو غير ملزم بالطبع ان مراتك وعيالك همه حياتك اللي انته عايشها بحلوها ومرها وانك ولامؤخذه من غيرهم ولاحاجة انا عارف الكلام ده مش هيجي على هوى ناس كتير لكن ده راي شخصي وعايزك تفكر انت فايدتك ايه في الدنيا وعايش ليه ومين اللي ممكن يهتم بيك او يسأل عليك ومين اللي ممكن يسعدك وتبقى مبسوط انت معاه وخصوصا لو كان الحب الأول والأخيروعليه أربع عيال هديه

فعلا صدق الله العظيم "المال والبنون زينة الحياة الدنيا والباقيات الصالحات خير عندك ربك ثوبا وخير أملا"سورة الكهف

أحلى حاجة في النت

أخيرا وبعد لف ودوران في النت ومرمته في المواقع اصل محسوبكم قديم في النت من ايام الشبكة أم فتل بلاستيك والديل أب الله يمسيه بالخير اللي كنت تكتب الموقع ويفتحلك بعد اسبوع- ده لو فتح يعني - المهم ماطولش عليكم لتنامو مني لقيت فعلا ان احسن حاجة في النت بعد الأخباروالتحميلات - مش اللبوس- أصل هنا في السعودية بيسمو اللبوس تحاميل فأنا بتكلم على الداون لود مش على حاجة تاني . لقيت فعلا أن المدونات دي أحلى حاجة في النت اه والله تكتب اللي انته عايزه وبرضه تقرا اللي انت عايزه كلام مش ممكن تقراه في أي حته فعلا المدونات دي شئ رائع وكفايه بس تقرا كام مدونة عشان تتأكد إن فيه مواهب فعلا في الكتابة مش لاقية فرصتها وممكن يمسكوا جرايد احسن من ممتازالقط رئيس تحرير ميكي ماوس اللي واحد صاحبي شبه بأن سمير رجب الله يحرقة بجاز جنبه يبقى سيدنا بلال وعلى فكره في مقال رائع لسئ الذكر الحيوان أقصد القط هتلاقوه في مدونة أخونا أبو الدراويش صاحب التعليق السابق المهم ندعوا الله سبحانه وتعالى يديمها علينا نعمة اننا نقراء براحتنا ومنصحاش بكره من النوم نلاقي الحكومة معينة رئيس تحرير للمدونات وتشتري السايت بتاع البلوجر وتقول اللي عايز يكتب حاجة لازم يكتبه على عرض حال دمغة ويوقع علية اتنين موظفين طلعو على المعاش المبكر ويبعت الموضوع على الحزب الواطي الديمقراطي - معلش سيبوني اشتم فيهم شويه ولاد ال..... أصلي محروق منهم قوي اللي ناهبين البلد دول على العموم كفاية كده اهو الكلمتين دول هيخلوني بره مصر كام سنه زي ما انا عايز بس مصيبة الصبح لو أخدت خروج نهائي هروح فين ؟؟؟ ربنا يستر علينا ويخليلنا المدونات والتعلب فات فات

هو برضه مش شغال !!!!!

كنت قاعد في امان الله لا بيه ولا عليا بتفرج على برنامج محترم وبتقدمه مذيعة محترمه وبعدين الست قالت فاصل قلنا وماله استراحة بسيطة مفيهاش حاجة ونرجع لكن اول اعلان صدمني واحد ست مش محترمه لابسه من غيرهدوم ومستنيه واحد ومش عارفين ده يبقى جوزها ولا عشيقها اصلها بتقوله انا برن عليك من امبارح وانت خارج نطاق الخدمه لغاية كده بإستثناء اللبس مفيش مشاكل لكن تقوله هو برضه مش شغال دي بقى المصيبة يعني لما عيل من ولادي يسأني هوه ايه اللي مش مشغال يابابا أقوله ايه السيكوسيكو
يعني مسامير وقلنا ماشي شفاطات وقولنا هتعدي محدش فاهم حاجة والعبرة في الصلابة انما بالمفتشر كده "هو برضه مش شغال ولا ايه " فاضل ايه بقى موقف تمثيلي وده الإعلان اللي جاي في عصر الفضائيات
وبعدين ايه موضوع اكيد رصيدك هيزيد و36 ساعه هيه حرب يعني حتى لو الواحد فكر ياخده يوم الخميس هيروح يصلي الجمعة ازاي وهوه رافع علم مصر يعني سيادتك تاخد الحبه وتأخد معاها أجازة 36 ساعة لغاية لما ربنا يفك سجنك على العموم ربنا لا يحوجنا لا للحبة الزرقة ولا الحبه الصفرا ويخليلنا الفول والخص والجرجير

البداية من هنا يابشر - أول القصيدة

بسم الله الرحمن الرحيم

الحمد لله رب العالمين والصلاة والسلام على افضل المرسلين سيدنا محمد وعلى اله وصحبه وسلم
أخونا في الله المواطن وليد سهيل كان نفسه من زمان نعمل ويب سايت نسجل فيه يومياتنا أقصد بولاتنا - بولاتنا دي من البوله وليست من حاجه تانية لا سمح الله - معلش احنا بنحب نوضح الكلام -المهم مطولش عليكم لتنامو مني ومن هنا نبداء إنشاء الله
أحب أعرفكم على الشلة الصايعة الضايعة بتاعتنا اللي هيا تخصص بولات وطاولات وشطرنجات وهنبداء ابجدي عشان محدش يعترض ويقولك هو حد قسملك هو انت فنط الكوتشنة وانا عايز أقعد هنا المهم نبداء أبجدي .
أولا أخونا المواطن سعيد عبدالرحمن الشهير بأبو نورا مواطن كادح كل يوم خميس بيجي خلصان ويقولك كنت في المدعكه والله انا نفسي اروح اشوف المدعكة بتاعة أخونا سعيد أهو ناخد شوية خبرة ونعرف الراجل ده بيجي خلصان كده ليه ده يا عيني يلعب بوله ويتكوم على الكنبة - مش هوه بس طبعا- بس تشوفه أول ما يستلم الكنبه أكنه دخل في مدعكه تانية وهات ياشخير يجيب أخر الجامعة طبعا عشان كنا عند أخونا الفرارجي أبوكوكو وده طبعا غير الإشارات اللي بيعملهابإيده وهوه نايم - إن الله حليم ستار - ورفع القلم عن ثلاث منهم النائم ومش هنقولك انت كنت بتعمل ايه يا حج سعيد والحمد لله أن معناش ستات كنا رحنا في داهيه وبصراحة ياخونا الراجل شكله كده متجوز أربعة وبيشتغلنا, منهم أكيد واحده في مكه والباقي متوزع في ربوع جدة وإن شاء الله العصفورة هتكشفه وتقولنا بيعمل ايه في المدعكه بس الأمانه لله الحاج سعيد ده أطيب واحد في الشلة بتاعتناتتفرج عليه وهوه بيلعب تقول الراجل ده أستاذ لعب قبل كل لمة يسألك 3 أسئلة - شوف الحرص إذاي - السؤال الأول هوه القطوع أيه ؟ والسؤال التاني هو انا طالب كام لمه ؟ والسؤال التقليدي هيه الأرض ايه؟ يعني الكروت في الأرض لونها ايه - بالذمة شفتوا حد حريص في اللعب ذي كده والغريب وانه بعد الإجابات الإجبارية من الأخوة المشاركين في اللعب على أخونا الحاج سعيد إلا أنه لازم يسأل سؤال إختياري هوه وليد طالب كام لمه - قال يعني هيخسره- وبعدين طبعا لو الأرض ترفل يقطع هوه بالكاروه مع إن القطوع هارت ومفيش في إيده غير كارت واحد بيج -حد فهم حاجة- أخونا الحاج سعيد طيب الله ذكره نفسي أصورك فيديو وانت بتلعب عشان تخليه ذكرى للناشئين يتعلموا منك أصول اللعب

العضو الثاني حسب الحروف الأبجدية العربية أخونا المواطن شريف عباس والشهير بأبو كوكو وهو من مثقفين الشلة يعني بيحب يقرا كتير هتقولى يقرا ايه أقولك في السياسة والرياضة وبيقرا في الترب برضه وتلاقيه كل يوم جمعة عند مقبرة أمنا حوا هوه والعبد لله بيقروا وياخدو الرحمة ويبقى تموين الأسبوع كله .
وكان ممكن يطلع شيخ بس الله يجازي اللي كان السبب لكن برضه هوه كان عنده ميول بوظان بس مش لاقي اللي يوجهه وأهو لقاه خلاص – الله يرحمك ياشوشو - وأخونا شريف ده عين من أعيان الجامعة وساكن في الجامعة من زمان من أيام ما كانت ثانوية وللا يمكن إعدادية مش فاكر أصلي كنت في الروضة ساعتها . وأخونا ابو كوكو من الشخصيات الطيبة جدا جدا يعني تحطو في المكان ترجع تلاقيه ذي ماهوه من الشغل للبيت ومن البيت للشغل ,وكان ممكن يبقىحاجة كبيرة قوي سمسار اراضي مثلا و كان بيذاكروبيحض عفاريت أقصد سي بي ايهز – طبعا الكلام ده كان زمان- دلوقتي من ساعة مابوظه الله يسامحه- بقى بيداوم في القهوة أكتر من البيت وأدمن الطاولة وبقى بيشم شرابات - حريمي طبعا - وبطل مذاكر وتلاقيه ماسك كتب غريبة من عينة " اللوائح المدروسة في الطاولة المحبوسة" أو كتاب " كيف تمسك في الخشب من غير قلة أدب"أما بقى في الإستميشن فهو لا يشق له غبار ماشاء الله تتفرج على لعيب كبير طول ماهو قاعد يقعد يدعك إيده في ركبته- الحمد لله انها ركبته- ويفكر في كل لمه تفكير عميق جدا ونتحايل عليه كلنا ألعب يقولك" ثانية واحده!!! ثانيه واحدة!!!! أتحزم واجيلك "شوفتو وصلتو الراجل لفين يامجانين طبعا من عاشر القوم. المهم طبعا في نهاية كل دور في البولة كل الناس حتى اللي مش بيلعبوا يتهموه انه هوه اللي خسرهم مع إن الراجل مظلوم وبيلعب بحسن نيه بس زيادة عن اللزوم. أخويا شريف بحسدك على هدؤك وطول بالك علينا وعلى رأي حسن المستكاوي " كابتن فلافيوممكن أتصور جنبك

أبو مودي (الهادئ دائماً والساخن أحياناً)
ولقاءنا الأن أيها الأحباب مع العضو التالت في الشبكة أخونا في الله طارق وأسمه الحركى جاد المولى وحاليا يُدعى وبنجاح كبير أبومودي الخطير وهنرجع في الكلام عن مغامرات مودي في موقع سبيس تون إن شاء الله ,
أما الأن نتكلم عن كبير مشجعي الأهلي في جدة يعني لامؤخذة حامي حمي الألوية الحمراء – أكيد في حد هيعرف إيه الألوية الحمراء دي – وأخونا المواطن أبومودي ده أهدى واحد في الشلة –أي والله – بس ماحدش ينكشه وإلا سوف يلقى ما لا يسره وعلى فكره هوه مبيسخنش غير على عضو واحد – طبعا عارفينه-
بس عنده مشكلة مع وسائل الإعلام والمشكلة دي بيتناولها دائما الرأي العام في الفضائيات وعلى مواقع الإنترنت المختلفة أنه حساس – مش بيشرب حسيس- يعني لازم تحسس قبل ماتكلمه مش تحسس عليه لاء تحسس على الكلام معاه – ده مش كلامي دي وسائل الإعلام - وأنا أعتقد في رأيي الشخصي أن وسائل الإعلام ظلماه وقد جانبها الصواب في الكلام عنه لأن التليفزيونات والرداوي والجرانين الموجودة في جدة يملكها رجل الأعمال السحرية الزملكاوي المعروف أبومازن – بتاع فلسطين مش حد تاني – وانتم عارفين أنه زملكاوي
وأخونا في الله أبومودي خريج جامعة الأزهر ودي كانت مفأجاة كبيرة لي شخصيا بس مش عارف إزاي محاسب وخريج أزهر يعني مثلا يقرا ربع قبل مايسجل القيد في الدفاتر . والله دي كانت أول مرة أعرف إن الأزهر بيخرج محاسبين لكن الراجل بصراحة مالي مركزه في مؤسسة العيسائي للسيارات , مفيش ورقة تعدي من تحت إيده غير ويكتب عليها أذكار الصباح والمساء ومفيش قيد يتعمل قبل مايصلي عليه ركعتين أما الميزانية بقى دي فلازم فيها صيام 3 يام , أمال إيه فاكرين خريج الأزهر ده محاسب عادي كده زيينا يعمل القيد سادة من غير طقوس
أما في الإستيميشن بقى فهو أستاذ ورئيس قسم وفاز بالبطولة اللي فاتت – طبعا عشان كان فيه عضويين بيضربو في بعض طول الأدوار- وحاز على المركز الأول وتأهل لبطولة حواري الجامعة اللي هتقام الصيف القادم على الرصيف في الجنينة اللي أمام هايبر بنده .
نسيت أقولكم إن أخونا في الله بيحب موت يلعب وهو قاعد أمام التلفاز مش عارف ليه ولازم تكون قناة النيل للزبالة شغالة وطبعا لازم يكون رقمها 26 في الرسيفر – وإن شاء الله هنكلم مصنعي الرسيفرات في الصين وكوريا بتخصيص القناة 26 للنيل للزبالة- مع إن القناة دى أسم على مسمى فعلا.
أخويا طارق إذا كانت النيل للزبالة كده وأنت مدمنها أمال لما تطلع قناة الأهلي الفضائية هتعمل فينا ايه.
وأخيرا نصيحة أخوية الحلم ساسا ساسا ساسا ساسا سيد يا سيد !!!!!!!!!!!!!!!!!الأخلاق طبعا مع الإعتذار لفيلم أيظن .

معلش هنفوت الكلام عن العبد لله للأخر عشان ندى فرصة لعموم المشاهدين يدلو بدلوهم في الموضوع واللي عنده كلمه يكتبها وانا مش هزعل من أي حد يكتب أي حاجة لأنه كله في الأخر كلام عيال وطبعا أنتم عارفين اللي يمشي ورا العيال يجراله ايه.

أبومازن المثير للجدل
أما الأن فهنتكلم عن أهم الأعضاء المؤثرين بالمجموعة الشمسية أخونا رجل الأعمال السحرية أبومازن وطبعا أخونا وليد ميختلفش عليه أتنين راجل لطيف وظريف وقعدته حلوه – مش قعدته اللي بيقعد عليها أحسن حد يفهمنا غلط - إلا أنه رغم ذلك مثير للجدل وتصرفاته محل نقد دائم من جميع وسائل الإعلام المقروءة فقط لأنه مسيطر على المسموعة والمرئية بحكم إمتلاكه لـ 99% من أسهم قناة المنال الفضائية , وكذلك قناة أم لولو أف أم اللي بتتمتع بأكبر نسبة إستماع لدى حريم الشلة في جدة.ولا ينكر أحد تأثيرها على الرأي العام .وطبعا القنوات دي هيه التي بتدافع وساعات تهاجم أي وسيلة إعلام أخرى تنتقد أخونا المواطن .وأخونا خلف خلاف المحامي أقصد وليد مختلف عن جميع أعضاء الشلة في حاجات كتير أولها مثلا أنه الزملكاوي الوحيد رغم إن الزمالكاوية إنقرضوا من زمان وأهوه بنحاول نقنعة أنه يبطل الزمالك ويشجع حاجة فيها فايدة زي تليفونات بني سويف أهوه هياخد كام مكالمة ببلاش أويشجع فريق بتروجيت أو أنبي أوحتى بترول أسيوط اللي ممكن يدوله أنبوبه بوتجاز أويشجع المحلة أهو ممكن ياخدله توب قماش يستره في البرد بدل ماهو قاعد لنا كده على طول بالكومبليزون أويشجع المقاولون العرب يمكن ياخد طوبه في دماغه تعقله شوية.

ثاني الإختلافات أنه الوحيد اللي عنده عيلين بس والأتنين ماشاء الله عليهم كبار يعني مفيش بي بي ولا إإح ولا بامبرز ولا رضعني يا بابا ولا الواد جري إلحقة ولا البت عملت غيرلها , يعني بالصلاة على النبي كلنا بنمشى نسحب في العيال إشي كوكو على مريومة على سونة على مودي على سوسو وهو مكبر دماغة أكنَه عازب و مش متجوز مع إن الجواز ده حاجة ظريفة قوي خالص وأسألوني أنا مجربهم أربعة
.
ثالثا أنه دايما بيعتقد أن أراءه هيه الصحيحة ومادونها هو الباطل ويتبع سياسة خدوهم بالصوت لأثبات وجهة نظره وده طبعا بيزعل ناس كتير منه رغم إن الزعل ده بيبقى سوكيتي ومبياخدش وقت كبيرلأننا بنحبه وعارفين أن ليته بيضه أقصد نيته بيضه , وبعدين لأننا في الأول والأخر عيال بتلعب مع بعض وبعدين كل واحد يروح لمراته يعيطلها ويقولها الواد وليد خسرني النهارده والله لستناه تحت بيتهم واديله بالطوبة.
وللا الواد سعيد قطع على اللمة بتاعتي وخسرني دور دبل إسكور وديني لفسي له العربية وللا الواد طارق شيلني لمه بالأتنين الترفل طيب أنا هضربله ابنه مودي عشان يحرم وللا الواد محمد سكرت الأس القطوع وانا شيلت بالشايب – مع إن ده مستحيل- بكرة أحطله قشرت موز ادام بيتهم عشان رقبته تنكسر وللا الواد شريف خسرني البولة مع إن شريف في اليوم ده ملعبش – معلش على طول منطهدينك ياشوشو-
وأما أخر تقاليعة الجديدة إنه دلوقتي أصبح مدمن قهوة مش اللي بتتشرب لاء اللي بيقعدوا عليها ومش كده وبس ساحب اخونا الغلابة سعيد وشريف معاه وقال ايه بيلعبو طاولة .
هيبوظهم أنا عارف , وهيخليهم مدمنين زيه وكل يجيي ميعاد القهوة تلاقي الواحد منهم إيده بتاكله – معلش مشيها ايده - و يقول إلحقوني بالجرعة وطبعا يتصلوا عليه عشان يوديهم القهوة ويلاعبهم طاولة لاء وبيجبلهم زباين كمان وأكيد بياخد عمولة , شوفتو أخرة المشي البطال ايه , أنا خايف بعدين كل واحد منهم تلاقيه لابس بادي وإسترتش و ماسك طاولة وواقف في شارع التحلية بيوقف العربيات أوتو ستوب ويروح مع الزباين يلاعبهم في البيت , ماهو الكيف يعمل أكتر من كده. ودى أخرة اللي مايسمعش كلمة ماما تقولها.
والشهادة لله أنا شوفت هذا المواطن بيدخل عند الحلاق اللي جنب القهوة وبيقفلوا الباب عليهم ,بيعملو إيه مش عارف على العموم المرة الجاية هعمل خرم في الباب واتفرج .
ومن ساعتها بقيت مابروحش القهوة , هو الواحد ياخونا ليه إيه غير سمعته.
بيني وبينكم بقيت بروح الصبح لوحدي عشان محدش يشوفني – ده للأمانه – بس عشان أتفرج والله مش حاجة تانية .
وكل خميس يجينا بيطوح أخر الليل قال إيه كان في القهوة والزباين كانو كتير , الله يكون في عونه

على العموم كفاية كده النهارده والموقع مفتوح للي عايز يكتب فيه أي حاجة وكل حاجة فقط دوس على comment واكتب اللي إنته عايزه ومستنى أراءكم وإقتراحتكم لتطوير المدونة وإن شاء الله في المستقبل نبقى نخلي عيلنا يكتبو فيه .
واللي عايز يكتب حاجة ومش عارف يقولي وأنا أكتبهاله , تلاقوني قاعد قدام الموقع في إيدي ورقة بيضة وقلم كوبيا وصندوق كازوزا أهو الواحد يسترزق من الزوار اللي بيجوا في عز الضهر والدنيا زحمة.
وفي النهاية أقولكم كلكم أنا بحبكم جدا جدا وأننا فعلا ملناش غير بعض في الغربة ورب أخ لك لم تلده أمك رغم الإختلافات الكتير بين شخصيتنا إلا إننا قدرنا نتوائم وبصراحة البركة في الستات عشان همه اللي عرفونا ببعض وأخير اوليس أخرامحدش يزعل من الكلام المكتوب واللي عايز يمسح أو يعدل أي جزء مش عاجبه يقول وميتكسفش وأسعار التعديل رخيصة جدا الكلمة بمية ريال و السطر بخمسمية والموضوع بخمس تلاف والموقع كله للتقبيل بعشرين ألف حد عايز يشترى !!!!!!!!!!!!!!!!!!