ايه قيمتك من عيلتك

النهارده تقريبا عدى حوالي 42 يوم على سفر المدام والأولاد لمصر وطول المدة دي وانا بصراحة حاسس ان الدنيا ملهاش طعم رغم ان طعمها معاهم ساعات مر شوية او على رائ المدام اني الحاضر الغائب في البيت والكلام ده هيه عندها حق فيه لان كان في موضوع واكل دماغي وانا بصراحة لما تكون فيه حاجة في دماغي بقعد اهرش اقصد بقعد افكر فيها ليل نهار مع اني انا اساسا من الناس اللي بتكبر دمغها لكن منه لله اللي دعا عليا

المهم نرجع لموضوعنا ايه هيه قيمتك في الدنيا دي من غيرأهلك وطبعا المقصود بأهلك بعد الأب والأم همه مراتك وولادك لأن بقيت أهلك إيدك منهم والأرض إلا ما رحم ربك ,يعني مثلا لو مراتك وولادك اخدو اجازة وسافرو وانت بقيت لوحدك حياتك هتبقى عاملة ازاي اكيد حاجة من اتنين

واحد هيقولك ياعم ده كده فل الفل وتعيش حياتك وتعمل اللي نفسك فيه وتخرج وتطلع زي ما انت عايز من غير تحقيق وتصرف زي ما انت عايز من غير تفتيش واكيد اصحاب النظرية دي مش كتير من اللي اعرفهم هو واحد بس واكيد عارف نفسه لانه كده كده عايش مع نفسه

اما النوعيه الثانية والعبدلله منهم في الأول تحس كده انك حروالحياة هتبقى لذيذة وبقيت لوحدك وهتعمل اللي انته عاوزه بعدين تكتشف اساسا انك كنت بتعمل اللي انت عاوزه ومفيش جديد يتعمل اساسا بعدين الاقي نفسي مش عارف اعمل ايه حساس اني مليش لازمه في الدنيا اه والله احساس غريب تحس كده ان ربنا خلقك عشان تخلف العيال دي وتربيها ده لو ماكنش همه اللي بيربوك واحساس الوحده ياخدك كل يوم وتكلم نفسك وتقعد على النت وربنا يخليلينا الدي اس ال والمدونات فعلا اختراع ممتاز هنرجعله في موضوع تاني

يعني الخلاصة في رأيي الشخصى وهو غير ملزم بالطبع ان مراتك وعيالك همه حياتك اللي انته عايشها بحلوها ومرها وانك ولامؤخذه من غيرهم ولاحاجة انا عارف الكلام ده مش هيجي على هوى ناس كتير لكن ده راي شخصي وعايزك تفكر انت فايدتك ايه في الدنيا وعايش ليه ومين اللي ممكن يهتم بيك او يسأل عليك ومين اللي ممكن يسعدك وتبقى مبسوط انت معاه وخصوصا لو كان الحب الأول والأخيروعليه أربع عيال هديه

فعلا صدق الله العظيم "المال والبنون زينة الحياة الدنيا والباقيات الصالحات خير عندك ربك ثوبا وخير أملا"سورة الكهف